ರಾಧಾಕೃಷ್ಣ ತೊಡಿಕಾನ
ಕರಾವಳಿ ಭಾಗದಲ್ಲಿ ಕೃಷಿಕರಿಗೆ ಅಡಿಕೆ ಅಥವಾ ರಬ್ಬರ್ ಬಿಟ್ಟರೆ ಇತರ ಕೃಷಿಯತ್ತ ಒಲವು ಕಡಿಮೆ. ಈ ಬೆಳೆಗಳ ಬೆಲೆ ಏರುಪೇರಾದಾಗ ಕೃಷಿಕರ ಆರ್ಥಿಕತೆ ಮೇಲೆ ಹೊಡೆತ ಬೀಳುತ್ತದೆ. ಸಮಗ್ರ ಕೃಷಿಯಿದ್ದರೆ ಒಂದು ಬೆಳೆ ಕೈಕೊಟ್ಟರೆ ಮತ್ತೊಂದು ಬೆಳೆ ಆದರಿಸುತ್ತದೆ. ಶಿರ್ಲಾಲಿನ ಧರಣೇಂದ್ರ ಜೈನ್ ಅವರು ಸಮಗ್ರ ಕೃಷಿಯನ್ನು ಅವಲಂಭಿಸಿಕೊಂಡು ಯಶಸ್ಸು ಸಾಧಿಸಿದವರು. ಮನ್ನಣೆಗೂ ಪಾತ್ರರಾದವರು. ತೋಟದ ಪ್ರಧಾನ ಬೆಳೆ ಅಡಿಕೆ. ಆದರೂ ತೆಂಗು, ಕಾಳುಮೆಣಸು ಹಾಗೂ ಇತರ ಬೆಳೆಗಳು ನಳನಳಿಸುತ್ತಿವೆ
ಕಾರ್ಕಳ ತಾಲೂಕಿನ ಶಿರ್ಲಾಲು ಗಾಮದ ಪಂಡಿತಬೆಟ್ಟು ನಿವಾಸಿ ಧರಣೇಂದ್ರ ಜೈನ್ ಅವರು ಶಿವಮೊಗ್ಗದಲ್ಲಿ ತನ್ನ ಸಹೋದರ ಅಶೋಕ್ ಕುಮಾರ್ ಜೈನ್ ಅವರೊಂದಿಗೆ ವ್ಯಾಪಾರೋದ್ಯಮದಲ್ಲಿ ತೊಡಗಿಕೊಂಡಿದ್ದರು. ಅನಿವಾರ್ಯವಾಗಿ ಕೃಷಿಕ್ಷೇತ್ರಕ್ಕೆ ಇಳಿದ ಅವರಿಗೆ ಆರಂಭದಲ್ಲಿ ಅನುಭವದ ಕೊರತೆ ಕಾಡಿತು. ಕಷ್ಟ ನಷ್ಟ ಅನುಭವಿಸಬೇಕಾಯಿತು. 2010 ರವರೆಗೆ ಭತ್ತ, ಅಡಿಕೆ ಬೆಳೆ ಮಾತ್ರ ನಂಬಿಕೊಂಡಿದ್ದ ಅವರಿಗೆ ಕೃಷಿ ಆರಂಭದಲ್ಲಿ ಕೈ ಹಿಡಿಯಲಿಲ್ಲ. ಸಾಕಷ್ಟು ಏರುಪೇರುಗಳಾದವು. ಆದರೂ ಧೃತಿಗೆಡದೆ ಸಮ್ಮಿಶ್ರ ಕೃಷಿಗೆ ಒತ್ತು ನೀಡಿದರು. ಈಗ ಮುಖ್ಯ ಬೆಳೆಯಾದ ಅಡಿಕೆ ಸುಮಾರು 2000 ಗಿಡ ಮರಗಳಿವೆ. ಮಂಗಳ ಸೇರಿದಂತೆ ಅಡಿಕೆಯ ವಿವಿಧ ತಳಿಗಳಿವೆ.
ತೆಂಗು ಕಂಗಿನ ತುಂಬಾ ಕಾಳುಮೆಣಸಿನ ಬಳ್ಳಿಗಳು ಆವರಿಸಿಕೊಂಡಿವೆ. ಪಣಿಯೂರು ವಿವಿಧ ತಳಿಗಳನ್ನು ಹಿಪ್ಪಲಿಗೆ ಕಸಿ ಮಾಡಿ ನೆಟ್ಟು ಬೆಳೆಸಿದ್ದಾರೆ, ಒಂದು ಸಾವಿರ ಕಾಳುಮೆಣಸು ಬುಡಗಳಿವೆ. 3-4 ಕ್ವಿಂಟಾಲ್ ಕಾಳುಮೆಣಸು ಅವರ ಆದಾಯ ಹೆಚ್ಚಿಸಲು ಸಹಕಾರಿಯಾಗಿದೆ. ತೆಂಗು, ಸ್ಥಳೀಯ ತಳಿಯ ಬಾಳೆಗಳಿವೆ.
ಭತ್ತದ ಬೇಸಾಯ
ಕರಾವಳಿ ಜಿಲ್ಲೆಯಲ್ಲಿ ತೋಟಗಾರಿಕಾ ಬೆಳೆಗಳಿಗೆ ಕೃಷಿಕರ ಆಸಕ್ತಿ ಹೆಚ್ಚು. ಗದ್ದೆಗಳೆಲ್ಲವೂ ಅಡಿಕೆ ತೋಟಗಳಾಗಿ ಪರಿವರ್ತನೆಗೊಳ್ಳುತ್ತಿವೆ. ಅಪರೂಪಕ್ಕೆ ಕೆಲವು ಮಂದಿ ಭತ್ತದ ಬೇಸಾಯ ಉಳಿಸಿಕೊಂಡಿದ್ದಾರೆ. ತಲೆತಲಾಂತರದಿಂದ ಬಂದ ಭತ್ತದ ಕೃಷಿಯನ್ನು ಬಿಡಬಾರದು. ತಮ್ಮ ಮನೆ ಬಳಕೆಗಾದರೂ ಇರಲಿ. ಅಂಗಡಿಯಿಂದ ಅಕ್ಕಿ ತಂದು ಉಣ್ಣುವ ಪರಿಸ್ಥಿತಿ ಬರಬಾರದು ಎಂಬ ಉದ್ದೇಶದಿಂದ ಕೆಲ ಮಂದಿ ಕೃಷಿಕರು ಭತ್ತದ ಕೃಷಿ ಮಾಡುತ್ತಿದ್ದಾರೆ. ಅದೇ ಉದ್ದೇಶದಿಂದ ಧರಣೇಂದ್ರ ಜೈನ್ ಅವರು ಭತ್ತದ ಕೃಷಿಯನ್ನು ಉಳಿಸಿಕೊಂಡಿದ್ದು ಕಜೆ ಜಯ, ಮಲ್ಲಿಗೆ ತಳಿಯನ್ನು ಬೆಳೆಯುತ್ತಾರೆ. ಮನೆ ಬೆಳಕೆಗೆ ಬೇಕಾದಷ್ಟು ಉಳಿಸಿ ಮಿಕ್ಕಿದ್ದನ್ನು ಮಾರಾಟ ಮಾಡುತ್ತಾರೆ.
ಹೈನುಗಾರಿಕೆ
ಕೃಷಿಕರಿಗೆ ದನ ಸಾಕಣೆ ಮುಖ್ಯ. ಇದರಿಂದ ಕೃಷಿಗೆ ಬೇಕಾದ ಗೊಬ್ಬರಕ್ಕೆ ಮಾಡುವ ವೆಚ್ಚ ಕಡಿಮೆಯಾಗುತ್ತದೆ. ಅದರ ಜತೆಗೆ ಇತರ ಪರೋಕ್ಷ ಪ್ರಯೋಜನಗಳಿವೆ. ತೋಟದ ಹಸಿರು ಹುಲ್ಲು, ಅಡಿಕೆ ಹಾಳೆ, ಜಾನುವಾರುಗಳಿಗೆ ಆಹಾರವಾಗುತ್ತದೆ. ಜರ್ಸಿ, ಹೆಚ್‌ಎಫ್, ಗೀರ್, ಮಿಶ್ರ ತಳಿ ಸೇರಿದಂತೆ 1೦ ದನಗಳನ್ನು ಸಾಕಿದ್ದಾರೆ. ಪ್ರತಿದಿನ 20-25 ಲೀಟರ್ ಹಾಲು ಸಂಘಕ್ಕೆ ನೀಡುತ್ತಾರೆ. ಸಗಣಿ ಗಂಜಲದಿಂದ ಗೊಬ್ಬರವಲ್ಲದೆ ಗೋಬರ್ ಗ್ಯಾಸ್ ಉತ್ಪಾದನೆ ಮಾಡಲಾಗುತ್ತದೆ. ಸ್ಲರಿಯನ್ನು ಸಂಗ್ರಹಿಸಿ ತೋಟಕ್ಕೆ, ಭತ್ತದ ಗದ್ದೆಗೆ ಬಳಸುತ್ತಾರೆ. ಗೋಬರ್ ಗ್ಯಾಸ್ ಬೇರೆ ಗ್ಯಾಸಿನ ಅವಲಂಬನೆಯನ್ನು ಕಡಿಮೆ ಮಾಡಿದೆ
ತರಕಾರಿ
ಇತರ ಕೃಷಿಯೊಂದಿಗೆ ತರಕಾರಿಯನ್ನು ಬೆಳಸುವುದು ಅವರ ಆಸಕ್ತಿಯಲ್ಲೊಂದು. ಸಾಂಬಾರು ಸೌತೆ, ಮುಳ್ಳು ಸೌತೆ, ಅಲಸಂಡೆ, ಬೆಂಡೆ, ಬಸಳೆ, ಮೆಣಸು ಹಲವು ನಮೂನೆಯ ತರಕಾರಿ ಬೆಳೆಯುತ್ತಾರೆ. ಬಿಳಿ ಬೆಂಡೆ ಬೀಜಕ್ಕೆ ಬೇಡಿಕೆಯಿದ್ದು ಕಿಲೋವೊಂದಕ್ಕೆ 1೦೦೦ ರೂಪಾಯಿ ಬೆಲೆಯಿದೆ. ತೋಟಗಾರಿಕೆ ಇಲಾಖೆ, ಬ್ರಹ್ಮಾವರ ಕೆವಿಕೆಗೂ ಬೀಜ ನೀಡುತ್ತಾರೆ. ಪಪ್ಪಾಯಿ ಬೆಳೆಯಿದೆ. ಬೆಳೆದ ಪಪ್ಪಾಯಿಗೆ ಸ್ಥಳೀಯವಾಗಿಯೇ ಮಾರುಕಟ್ಟೆಯಿದೆ. ಅದಕ್ಕಾಗಿ ಮಾರುಕಟ್ಟೆ ಹುಡುಕುವ ಅವಶ್ಯಕತೆಯಿಲ್ಲ.
ಜೇನು ಸಾಕಾಣೆ ತೋಟದ ಬೆಳೆಗಳ ಫಸಲು ಹೆಚ್ಚಿಸಲು ಸಹಕಾರಿ. ತೋಟದ ಬೇರೆ ಬೇರೆ ಭಾಗಗಳಲ್ಲಿ 10 ಜೇನು ಪೆಟ್ಟಿಗೆಯಿರಿಸಿದ್ದು ಇದರಿಂದ ತೋಟದ ಇಳುವರಿ ಹೆಚ್ಚಲು ಅನುಕೂಲವಾಗಿದೆ. ಜೇನು ತುಪ್ಪಕ್ಕೆ ಸ್ಥಳೀಯವಾಗಿಯೇ ಬೇಡಿಕೆ ಇದೆ. ಕೃಷಿಕರಲ್ಲಿ ಜೇನು ಸಾಕಣೆ ಇದ್ದರೆ ಪರಾಗಸ್ಪರ್ಶಕ್ಕೆ ತುಂಬಾ ಅನುಕೂಲವಾಗುತ್ತದೆ. ಅಡಿಕೆ ಗಿಡದ ನರ್ಸರಿಯೂ ಇದ್ದು ಗಿಡಗಳನ್ನು ಮಾರಾಟ ಮಾಡುತ್ತಾರೆ.
ಅಡಿಕೆ ಒಣಗಿಸಲು ಮಣ್ಣಿನ ಅಂಗಳ
ಬಹಳಷ್ಟು ಕಡೆಗಳಲ್ಲಿ ಅಡಿಕೆ ಒಣಗಿಸಲು ಕೃಷಿಕರು ಸೋಲಾರ್ ಗೂಡುಗಳ ಮೊರೆ ಹೋಗಿದ್ದಾರೆ. ಇದು ಅನುಕೂಲವೂ ಕೂಡ. ದೊಡ್ಡ ಬೆಳೆಗಾರರು ಸಿಮೆಂಟ್ ಅಥವಾ ಇಟ್ಟಿಗೆಗಳನ್ನು ಬಳಸಿ ಅಡಿಕೆ ಒಣಗಿಸಲು ಅಂಗಳ ತಯಾರಿಸಿಕೊಂಡಿರುತ್ತರೆ. ಧರಣೇಂದ್ರ ಜೈನ ಅವರ ಅಂಗಳವಿನ್ನೂ ಮಣ್ಣಿನದೆ. ಮಣ್ಣಿನ ಅಂಗಳವನ್ನು ಗಟ್ಟಿಗೊಳಿಸಿ ಗೇರುಬೀಜದ ಎಣ್ಣೆಯನ್ನು ಸವರಿ ಹದಗೊಳಿಸಿದ ಅಂಗಳವಿದು. ತಾಪಮಾನವನ್ನು ಒಂದೇ ರೀತಿಯಾಗಿ ಹಿಡಿದಿಟ್ಟುಕೊಳ್ಳುವ ಈ ಅಂಗಳದಲ್ಲಿ ಭತ್ತ, ಅಡಿಕೆ ಒಣಗಿಸಲು ಸಹಕಾರಿ ಎನ್ನುತ್ತಾರೆ ಧರಣೇಂದ್ರ ಜೈನ್. ಕೂಲಿ ಕಾರ್ಮಿಕರ ಸಮಸ್ಯೆ ಇರುವುದು ನಿಜವಾದರೂ ಅವರಲ್ಲಿ ಮೂರು ಮಂದಿ ಕೆಲಸಗಾರರಿದ್ದಾರೆ. ಹೆಚ್ಚು ಅವಶ್ಯಕತೆ ಇದ್ದಾಗ ಕೆಲಸದಾಳುಗಳನ್ನು ಕರೆಸಿಕೊಳ್ಳುತ್ತಾರೆ. ಈ ನಡುವೆ ಯಾಂತ್ರಿಕರಣದತ್ತ ಹೆಚ್ಚು ಒತ್ತು ನೀಡಿದ್ದಾರೆ.
ಧರಣೇಂದ್ರರವರ ಸಮಗ್ರ ಕೃಷಿಯ ಸಾಧನೆಗೆ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ದೆಹಲಿಯ ಕಿಷಾನ್ ಜಾಗರಣ ಮಂಚ್ ನೀಡುವ ಸಮಗ್ರ ಪ್ರಶಸ್ತಿ, ಶಿವಮೊಗ್ಗ ಕೃಷಿ ವಿ.ವಿಯಿಂದ ಪ್ರಶಸ್ತಿಗಳು ಸಂದಿವೆ. ಸ್ಥಳೀಯ ಸಂಘ ಸಂಸ್ಥೆಗಳು ಅವರನ್ನು ಗೌರವಿಸಿವೆ.
ಕೃಷಿ ಕ್ಷೇತ್ರದಿಂದ ಯಾರೂ ದೂರವಾಗುವಂತಹ ಅವಶ್ಯಕತೆಯಿಲ್ಲ. ಕೃಷಿಯನ್ನು ಖುಷಿಯಿಂದಲೇ ಮಾಡಬೇಕು. ಭೂಮಿಗೆ ಕೃಷಿಗೆ ಹಾಕಿದ ಹಣ ಹಾಳಾಗುವುದಿಲ್ಲ. ಕೃಷಿಯನ್ನು ಲಾಭದಾಯಕವಾಗಿ ಮಾಡಬಹುದು. ಯುವಕರು ಕೃಷಿ ಕ್ಷೇತ್ರದಲ್ಲಿ ತೊಡಗಿಕೊಳ್ಳಬಹುದು ಎನ್ನುವ ಜೈನ್ ಅವರು ತಮ್ಮ ಕೃಷಿ ಅನುಭವವನ್ನು ಹಾಗೂ ಅದರಲ್ಲಿ ಪಡೆದ ಯಶಸ್ಸನ್ನು ಬಿಚ್ಚಿಡುತ್ತಾರೆ ಮಾಹಿತಿಗೆ ಮೊ. 9740166294
