ಬೆಟ್ಟದ ಭೂಮಿಯಲ್ಲಿ ಕನಸಿನ ತೋಟ: ಒಂದು ಸ್ಪೂರ್ತಿದಾಯಕ ಕೃಷಿಗಾಥೆ!

ಆ ಗೆಳೆಯ ಪೋನ್ ಇಟ್ಟ ಮರುಗಳಿಗೆಯಿಂದಲೇ ನನ್ನಲ್ಲಿ ಕುತೂಹಲ ಹೆಚ್ಚಾಗಿತ್ತು. ಆತನ ತೋಟದಲ್ಲಿ ಅಂಥಹ ವಿಶೇಷತೇ ಏನಿರಬಹುದು?! ಆತ ಸೊಸೈಟಿಯ ನೌಕರಿ ಮಾಡುತ್ತಾ ಇದ್ದವನು. ಈಗೆಲ್ಲ ನೌಕರಿಯಲ್ಲಿ ಇದ್ದವರೋ, ಉದ್ಯಮವನ್ನು ಮಾಡ್ತಾ ಬದುಕಿನ ಬಂಡಿ ಸಾಗಿಸುತ್ತಾ ಇದ್ದವರೋ…ಹೀಗೆ ಬೇರೆ ಕ್ಷೇತ್ರದಲ್ಲಿ ತಮ್ಮನ್ನು ಸಕ್ರೀಯವಾಗಿ ತೊಡಗಿಸಿಕೊಂಡವರು ತಮ್ಮದೇ ಕೃಷಿ  ಭೂಮಿಯ ಕೆಲಸಕ್ಕೆ ಬೀಡುವೇ ಸಿಗುವುದಿಲ್ಲ ಮಾರಾಯ್ಯ. ನಂಗೆಂತುವಾ ಕೃಷಿ ಕೆಲ್ಸ ಮಾಡಿಸುವುದೇ  ಬಳಹ ಕಷ್ಟ ಎಂದು  ಏನ್ನುವವರೇ ಈಗ ಹೆಚ್ಚು. ಅಂಥದ್ರಲ್ಲಿ,ಈತ ಅತ್ತ ನೌಕರಿಯನ್ನು ಮಾಡುತ್ತಾ; ಇತ್ತ ಕೃಷಿ ಕಾಯಕಕ್ಕು  ಸಮಯ ಕೊಟ್ಟಿದ್ದಾದ್ರು ಹೇಗೆ? ಆತ, ಈಗೇನು  ವಿಶೇಷ ಕೃಷಿ ಮಾಡುತ್ತಾ ಇರಬಹುದು, ಯಾವ ಬೆಳೆ  ಬೆಳೆದಿರಬಹುದು…ಹೀಗೆ ನಾನಾ ವಿಚಾರಗಳು ನನ್ನ ಮನಸ್ಸಿನೊಳಗೆ ಪುಟಿದೇಳತೊಡಗಿದವು.

 ಇವರು ಅತ್ತ ನೌಕರಿಯನ್ನು ಮಾಡುತ್ತಲೇ, ಇತ್ತ ತನ್ನ ಕೃಷಿ ಭೂಮಿಯನ್ನು ತಮ್ಮ ಇಚ್ಛೆಯಂತೆ ಅಭಿವೃದ್ಧಿ ಮಾಡಿ,ಕೃಷಿ ಕ್ಷೇತ್ರದಲ್ಲಿಯೂ ವಿಭಿನ್ನ ಸಾಧನೆ ಮಾಡಬಹುದು ಎಂಬುದಕ್ಕೆ ಈ ಕೃಷಿಕರೇ ಸಾಕ್ಷಿಯಾಗಿದ್ದಾರೆ ಎಂದರೂ ಅತೀಶಯೋಕ್ತಿ ಆಗಲಾರದು.

ಈಗ ಎರಡು ವರುಷಕ್ಕೊಮ್ಮೆ ಒಂದು ಬುಟ್ಟಿಯಷ್ಟು ದಡ್ಡಿ ಗೊಬ್ಬರ ,ಒಂದು ವರುಷ ಭೂಚೈತನ್ಯ ಗೊಬ್ಬರ/ ಅನ್ನಪೂರ್ಣ ಗೊಬ್ಬರವನ್ನು ಎರಡು ಕೆ.ಜಿ.ಯಷ್ಟು ಸಕಾಲದಿನದಲ್ಲಿ ಪ್ರತಿ ಮರಕ್ಕೆ ಕೊಟ್ಟು ಪೋಷಣೆ ಮಾಡುತ್ತಿದ್ದಾರೆ. ಅಲ್ಲದೆ, ವರುಷದಲ್ಲಿ ಎರಡು ಟೈಂ ನಲ್ಲಿ ತಜ್ಞರು ಸೂಚಿಸಿದಷ್ಟು ರಾಸಾಯನಿಕ ಗೊಬ್ಬರವನ್ನು ಕೊಟ್ಟು ಆರೈಕೆ ಮಾಡುತ್ತಾರೆ.ತೋಟಕ್ಕೆ ನೀರಾವರಿ ವ್ಯವಸ್ಥೆಯನ್ನು ಸಹಾ ಅಳವಡಿಸಿಕೊಂಡರು. ಹೀಗೆ ಇವರು ಅಡಿಕೆ ತೋಟಕ್ಕೆ ಇವತ್ತಿನ ದಿನಮಾನಕ್ಕೆ ಬೇಕಾಗುವುದನ್ನು ಅಣಿಗೊಳಿಸಿದರು. ಹೀಗೆ ಹಂತ ಹಂತವಾಗಿ ಬದಲಾವಣೆ ಮಾಡಿ, ಮಾಡುವ ಕೆಲಸಗಳನ್ನು ವ್ಯವಸ್ಥಿತವಾಗಿ ಸಕಾಲದಲ್ಲಿ ಮಾಡಿದರ ಪರಿಣಾಮ ಇವರ ತೋಟದ ಅಡಿಕೆ ಮರಗಳು ಚನ್ನಾಗಿ ಬಲಿಯ ತೊಡಗಿತು.

ಚಿಕ್ಕಹಿಂಡುವಳಿಯ ಕೃಷಿಕರಾದ ಗಿರೀಶ್ ಹೆಗಡೆ ಪ್ರಧಾನವಾಗಿ ಅಡಿಕೆ ಕೃಷಿ ಮಾಡಿದರೂ ಸಹಾ ಹಲವಾರು ಉಪ ಬೆಳೆಗಳನ್ನು ಬಹಳ ಆಸಕ್ತಿಯಿಂದ ಬೆಳೆಯುತ್ತಾ ಇರುವುದು ವಿಶೇಷ. ಒಂದಿಷ್ಟು ಬಾಳೆ, 350  ಹಿಂಡು ಏಲಕ್ಕಿ, ಹೊಸದಾಗಿ ನಾಟಿ ಮಾಡಿದ್ದು ಸೇರಿ  250 ಕಾಳುಮೆಣಸಿನ ಬಳ್ಳಿ,ವೆನಿಲ್ಲ (  ಕಳೆದ ಸೀಜನ್ನಿನಲ್ಲಿ ಇದ್ರ ಕಟಿಂಗ್ ಶೇಲ್ ಮಾಡಿ ಮೂವತ್ತು ಸಾವಿರ ಗಳಿಸಿದ್ದಾರೆ) …ಹೀಗೆ ತಮ್ಮ  ತೋಟದಲ್ಲಿ ಆಗಬಹುದಾದ ಉಪಬೆಳೆಗಳ ಕೃಷಿಗೂ ಆಶ್ರಯವನ್ನು ಕೊಟ್ಟು ಶ್ರದ್ದೆಯಿಂದ ಅದ್ರ ನಿರ್ವಹಣೆ ಮಾಡಿ,  ತೃಪ್ತಿದಾಯಕ ಫಲ

ಪಡೆಯುತ್ತಿದ್ದಾರೆ.ಜೊತೆಗೆ ಇವರ ಅಡಿಕೆ ತೋಟದಲ್ಲಿ ಹಳೆಯ ಕಾವೇರಿ ತಳಿ ಕಾಫಿ ಇಪ್ಪತ್ತೈದು ಗಿಡವಿದ್ದು ಅದರಿಂದ ಸುಮಾರು ಕ್ವಿಂಟಲ್ ಬೆಳೆ ಪಡೆದಿರುವ ಗಿರೀಶ್ ಹೆಗಡೆ  ಈ ಎಲ್ಲ ಉಪಬೆಳೆಗಳನ್ನು ನಿರ್ಲಕ್ಷ ಮಾಡದೇ ಅವುಗಳನ್ನು ವ್ಯವಸ್ಥಿತವಾಗಿ  ಆರೈಕೆ ಮಾಡುತ್ತಾ ಇರುವುದು ಗಮನಾರ್ಹ ಸಂಗತಿ.ಈ ತೋಟದ ಖಾಲಿ ಜಾಗದಲ್ಲಿ ಇಂಗು, ಹಲಸು, ಮಾವು,ಸಾಗವಾನಿ…ಹೀಗೆ ಭಿನ್ನ ಭಿನ್ನ ವಾದ ಗಿಡಗಳಿವೆ.

ಸಾಮಾನ್ಯವಾಗಿ ಈಗ  ಮಲೆನಾಡಿನ ಬಹುಭಾಗ ಜಮೀನಲ್ಲಿ ಅಡಿಕೆ ಕೃಷಿಯೇ ಮೈಸೆಟೆದು ನಿಂತಿದೆ.ಎಲ್ಲಿ ನೋಡಿದರೂ ಅಡಿಕೆ ಗಿಡಗಳೆ ರಾರಾಜಿಸುತ್ತಿವೆ. ಅದು, ಈ ಭಾಗದ ಪ್ರಧಾನ  ಬೆಳೆಯೇನೋ ಹೌದು.ಆದ್ರೆ ಈ ಭಾಗದ ಅನುಕೂಲವಿದ್ದ ರೈತರು, ಬೆಟ್ಟದ ಜಾಗವಿದ್ದ ತೋಟದ ಮಾಲೀಕರು ತಗ್ಗಿನ ಪ್ರದೇಶಕ್ಕಿಂತ, ಏತ್ತರದ ಭೂಮಿಯಲ್ಲಿಯೇ  ಅಡಿಕೆ ಕೃಷಿ ಚನ್ನಾಗಿ ಆಗುತ್ತೆ.ಅಲ್ಲಿ ನಿರ್ವಹಣೆಯೂ ಕಡಿಮೆ,ಸಾಕಷ್ಟು ಇಳುವರಿಯನ್ನು ಪಡೆಯಬಹುದು ಎಂಬ ಉದ್ದೇಶದಿಂದ ಬೆಟ್ಟದ ಭೂಮಿ, ಕರಡವನ್ನು ಬೆಳೆಯುವ ಜಾಗದಲ್ಲಿಯೂ ಸಹಾ ಈಗ ಅಡಿಕೆ ತೋಟ ತಲೆಏತ್ತಿ ನಿಂತಿದೆ. ಸದ್ಯದ ವಾತಾವರಣ ಹೀಗಿದ್ದರೂ ಸಹಾ ಉಮ್ಮಚ್ಗಿ ಸಮೀಪದ ಬೆಳಗುಂದ್ಲಿಯ ಗಿರೀಶ್ ಹೆಗಡೆ ಸೊಪ್ಪಿನ ಬೆಟ್ಟವನ್ನು ಅಡಿಕೆ ತೋಟವಾಗಿ ಪರಿವರ್ತಿಸಲು ಆಸಕ್ತಿ ತೊರದೇ ” ಹಣ್ಣುಹಂಪಲಿನ ವನ”ವಾಗಿ ಮಾರ್ಪಡಿಸಿರುವುದು ನಿಜಕ್ಕು ಹೆಮ್ಮೆಯ ಸಂಗತಿ.

ಉಮ್ಮಚ್ಗಿ ಸೊಸೈಟಿಯಲ್ಲಿ ನೌಕರರಾಗಿ ಸೇವೆ ಸಲ್ಲಿಸುತ್ತಿರುವ ಗಿರೀಶ್ ಹೆಗಡೆ ಅವರು ಸುಮಾರು ಎರಡು ಎಕರೆ ಪ್ರದೇಶದಲ್ಲಿ 800 ಜಿ- 9 ಬಾಳೆಯನ್ನು ಮೇ.8, 2025 ರಲ್ಲಿ ಮಾರ್ಗದರ್ಶಕರ ನಿರ್ದೇಶನದಂತೆ  ಹೂಳಿದರು. ಬಾಳೆಯ ಮಧ್ಯೆ ಅಲ್ಲಲ್ಲಿ ಒಂದಿಷ್ಟು ಅಂತರದಲ್ಲಿ  30 ರಂಭೂಟಾನ್,  30 ಬಟರ್ ಫ್ರುಟ್, 30 ಮ್ಯಾಂಗೊಸ್ಟಿನ್ ಇಂಥಹ ಹಣ್ಣಿನ ಗಿಡಗಳಿಗೆ ಜಾಗವಿಟ್ಟು,ಅವುಗಳನ್ನು ವ್ಯವಸ್ಥಿತವಾಗಿ ನೆಟ್ಟು ಪೋಷಿಸಿದರು. ಅಲ್ಲದೇ, ಈ ಬಾಳೆತೋಟದ ಸುತ್ತ  ಹೈಬ್ರಿಡ್ ತೆಂಗು,( ಸದ್ಯ 40  ಗಿಡವಿದೆ)ಬಗೆ ಬಗೆಯ ತಳಿಯ ಹಲಸು, ಅಪ್ಪೆ ಮಿಡಿಗೆ ಆದ್ಯತೆ ಕೊಟ್ಟು ವಿಭಿನ್ನ ಮಾವು,ಚಿಕ್ಕು, ಲಿಂಬು, ಮೂಸುಂಬೆ, ಪೇರಲೆ… ಹೀಗೆ ನಾನಾ

ರೀತಿಯ ಹಣ್ಣಿನ ಗಿಡಗಳನ್ನು ನೆಟ್ಟು ತಮ್ಮ “ಕನಸಿನ ತೋಟ”ವನ್ನು ಮಾದರಿ ತೋಟವಾಗಿ ಮಾರ್ಪಡಿಸಲು ಗಿರೀಶ ಹೆಗಡೆ ಅತೀವ ಪ್ರಯತ್ನವನ್ನು ಮಾಡಿದ್ದಾರೆ. ಬೀಡುವಿನ ಸಮಯವನ್ನು ಈ ತೋಟದಲ್ಲಿ ಇದ್ದು ಪ್ರತಿಯೊಂದು ಗಿಡವನ್ನು ಸೂಕ್ಷ್ಮವಾಗಿ ಗಮನಿಸಿ,ನಿತ್ಯವೂ ಅವುಗಳ ಲಾಲನೆ- ಪಾಲನೆಗೆ  ಆದ್ಯತೆ ಕೊಡುತ್ತಾ ಕಾಳಜಿಯಿಂದ ಅವುಗಳನ್ನು ಬೆಳೆಸುತ್ತಿರುವ ಇವರು,ಬಹಳ ಪರಿಶ್ರಮವನ್ನು ಪಡುತಿದ್ದಾರೆ. ಈಗಾಗಲೇ ಜಿ –  9 ಬಾಳೆಯೂ ಉತ್ಕೃಷ್ಟವಾದ ಗೊನೆಗಳು ಬಿಡಲು ಆರಂಭಿಸಿದೆ. ಅದನ್ನು ನೋಡುವುದೇ ನನಗೀಗ ನಿತ್ಯವೂ ಸಂಭ್ರಮ.! ಪ್ರತಿ ಬಾಳೆಗೊನೆ ಗೇಣುದ್ದದ ಕುಂಡಿಗೆ ನೋಡುತ್ತಲೇ  ಸಂತಸವನ್ನು ಹಂಚಿಕೊಳ್ಳುತ್ತಾರೆ ಈ ಕೃಷಿಕರು.

ಅಲ್ಲದೇ ಈ ಉತ್ಸಾಹಿ ಕೃಷಿಕರು ತಮ್ಮ ಕನಸಿನ ತೋಟದ ಇನ್ನೊಂದು ಭಾಗದಲ್ಲಿ ( ಸುಮಾರು ಮೂರು ಎಕರೆ ಪ್ರದೇಶದಲ್ಲಿ)ಬೆಟ್ಟದಲ್ಲಿರುವ ಪ್ರತಿಯೊಂದು ಮರಗಳನ್ನು ಉಳಿಸಿಕೊಂಡು, ಅದಕ್ಕೆಲ್ಲ ಕಾಳುಮೆಣಸಿನ ಗಿಡವನ್ನು ಹೂಳಿದ್ದಾರೆ. ಈಗಾಗಲೇ 250 ಪಿ-1 ತಳಿಯ ಮೆಣಸಿನ ತಳಿಯನ್ನು ನಾಟಿ ಮಾಡಿರುವ ಗಿರೀಶ್ ಹೆಗಡೆ  ಮುಂದಿನ ದಿನಗಳಲ್ಲಿ ಅದನ್ನು ವಿಸ್ತರಿಸುವ ಯೋಜನೇಯನ್ನು ಇಟ್ಟುಕೊಂಡಿದ್ದಾರೆ.ಇದೇ ಜಾಗದಲ್ಲಿ ತಜ್ಞರ ಸಲಹೆ ಮೇರೆಗೆ  450 ರೋಬೊಸ್ಟಾ ಕಾಫಿ, 50ದಾಲ್ಚಿನ್ನಿ, 50 ಜಾಯಿಕಾಯಿ,400 ಮಹಾಘನಿ ಗಿಡ ( ಮೆಣಸು ಹಚ್ಚುವ ಸಲುವಾಗಿ), ಗಳನ್ನು  ಶಿಸ್ತಾಗಿ  ಸರಿಯಾದ ಕಾಂಬಿನೇಷನ್ ಮಾಡಿ ನಾಟಿ ಮಾಡಿ ವ್ಯವಸ್ಥಿತವಾಗಿ ಜವಾಬ್ದಾರಿಯಿಂದ ನಿರ್ವಹಣೆ ಮಾಡುತ್ತಿದ್ದಾರೆ. ಕಳೆದ ಜೂನ್ ನಲ್ಲಿ ಅಷ್ಟೇ ಈ ವೈವಿದ್ಯಮಯ ಗಿಡಗಳನ್ನು ನೆಟ್ಟು ಆರೈಕೆ ಮಾಡುತ್ತಾ ಬಂದಿರುವ ಗಿರೀಶ್ ಹೆಗಡೆ ಆ ಗಿಡಗಳ ಬೆಳವಣಿಗೆಯನ್ನು ಕಂಡು ಬಹಳ ಸಂತೋಷವಾಗುತ್ತದೆ. ಇವುಗಳನ್ನು ನೋಡ್ತಾ ಇದ್ದರೇ ಮನೆಗೆ ಹೋಗಲು ಮನಸ್ಸೆ ಬರುವುದಿಲ್ಲ ಎಂಬ ಅಭಿಪ್ರಾಯವನ್ನು ವ್ಯಕ್ತಪಡಿಸುತ್ತಾರೆ. ನಾನು ಆಫೀಸ್ ಡ್ಯುಟಿ ಮಾಡುತ್ತಾ ಕಛೇರಿಯ ರಜಾದಿನ  ಹಾಗೂ  ಬೀಡುವಿನ ಸಮಯವನ್ನು ಕ‌ಸಿನ ತೋಟದ ಕಡೆಯೇ ನೀಡುತ್ತಾ ಇರುವುದರಿಂದ ಮನೆಯ ಕಡೆ ಹೆಚ್ಚಿನ ಸಮಯ ನೀಡಲು ನನ್ನಿಂದ ಆಗಲಿಲ್ಲ.ಮನೆಯ ಸಂಪೂರ್ಣ ಜವಾಬ್ದರಿಯನ್ನೇಲ್ಲ ನಿಭಾಯಿಸಿಕೊಂಡು, ನನ್ನ ಕೃಷಿ ಕಾರ್ಯಗಳಿಗೂ ಸಲಹೆ ಸೂಚನೆ ಕೊಡುತ್ತಾ ಬೇನ್ನುಲುಬಾಗಿ ನಿಂತವಳು ನನ್ನ ಪತ್ನಿ ಮುಕ್ತಾ. ಮನೆಯವಳ ಸಂಪೂರ್ಣ ಸಹಕಾರ ಇರುವುದರಿಂಲೇ ನನ್ನ ಈ ಕನಸಿನ ತೋಟ ನನಸಾಗಲು ಕಾರಣ ಎಂದು ಗಿರೀಶ್ ಹೆಗಡೆ ಹೆಮ್ಮೆಯಿಂದಲೇ ಹೇಳಿಕೊಳ್ಳುತ್ತಾರೆ.

ಸುಮಾರು ನಾಲ್ಕೈದು ಆಳಿನ ಧರೆಯನ್ನು ಇಳಿಯಬೇಕು. ತೋಟಕ್ಕೆ ಹೋಗಲು ಕಾಲುದಾರಿ ಇದ್ದರೂ ಸುತ್ತಿರುಗಿ ಬರಬೇಕು. ಆ ಸಮಯವನ್ನು ಉಳಿಸುವ ಸಲುವಾಗಿ ಗಿರೀಶ್ ಹೆಗಡೆ ತಮ್ಮ  ಕನಸಿನತೋಟದ ಅಂಚಿನಲ್ಲಿರುವ ಧರೆಗೆ ಅಲ್ಯುಮಿನಿಯಮ್ ಏಣಿ ಇಟ್ಟುಕೊಂಡಿದ್ದಾರೆ.ಆಧಾರಕ್ಕೆ ದಪ್ಪದಾದ ಹಗ್ಗವನ್ನು ಇಳಿ ಬಿಟ್ಟಿದ್ದಾರೆ. ಅದರ ಆದಾರದ ಮೇಲೆ ಪ್ರಯಾಸ ಪಟ್ಟು ಇಳಿಯುವುದು ಇವರಿಗೆ ದೊಡ್ಡ ಸಾಹಸದ ಕೆಲಸ!  ಕಷ್ಟಪಟ್ಟು ಏಣಿ ಮೂಲಕ ಹತ್ತಿಳಿಯುತ್ತಾರಲ್ಲ ಅದ್ಕೆ ಇವರ ಸಾಹಸವನ್ನು ಅಭಿನಂದಿಸಲೇಬೇಕು.ಬೇಸಿಗೆಯ ದಿನದಲ್ಲಿ ಈ ವ್ಯವಸ್ಥೆ ಇವರಿಗೆ ಅನುಕೂಲ ಎನ್ನುವುದನ್ನು ಬಿಟ್ಟರೇ, ಮಳೆಗಾಲದಲ್ಲಿ ಇಲ್ಲಿನ ಧರೆ ಹಿಸಿಯುವುದರಿಂದ  ಈ ಏಣಿಯ ಮೇಲಿಂದ ಇಳಿದು ತೋಟಕ್ಕೆ ಹೋಗಲು ಸಾಧ್ಯವಿಲ್ಲ ಎನ್ನುತ್ತಾರೆ ಗಿರೀಶ್ ಹೆಗಡೆ. ಮನಸ್ಸಿದ್ದರೇ ಮಾರ್ಗ..ಎಂಬ ವಾಡಿಕೆಯ ಮಾತು ಹೇಳುತ್ತಾರಲ್ಲ… ಹಾಗೇಯೇ ಬೆಟ್ಟದ ತೋಟದಿಂದ ಅಡಿಕೆ ತೋಟಕ್ಕೆ ಸುತ್ತಿರುಗಿ ಬರುವುದಕ್ಕಿಂತ, ಧರೆ ಅಂಚಿನಲ್ಲಿ

ಏಣಿ ಮೇಲಿಂದ ಇಳಿಯುವುದೇ ಸದ್ಯಕ್ಕೆ ಸುಲಭದ ದಾರಿ ಅನಿಸಿದ್ದರಿಂದ ಅದ್ನೇ ಉಪಯೋಗ ಮಾಡುತ್ತಿದ್ದೇನೆ ಎನ್ನುತ್ತಾರೆ ಗಿರೀಶ್ ಹೆಗಡೆ.