ಮಳೆ ನೀರು ಸಂಗ್ರಹಣೆಗೆ ‘ಕೃಷಿ ಭಾಗ್ಯ’ ಯೋಜನೆ: ಕೃಷಿಕರಿಗೆ ಸಿಗಲಿದೆ ಸಹಾಯಧನ!

​ಆಹಾರ ಉತ್ಪನ್ನಗಳನ್ನು ಬೆಳೆಯಲು ನೀರು ಅತ್ಯಗತ್ಯ. ಸೂಕ್ತ ಜಲಮೂಲಗಳಿಲ್ಲದಿದ್ದರೆ ತೀವ್ರ ನೀರಿನ ಕೊರತೆ ಉಂಟಾಗಿ, ಬೆಳೆಗಳು ಒಣಗಿ ಕೃಷಿ ನಷ್ಟವಾಗುವ ಸಾಧ್ಯತೆಯಿರುತ್ತದೆ. ನಮ್ಮ ದೇಶದಲ್ಲಿ ಬಹುತೇಕ ರೈತರು ಮಳೆಯಾಶ್ರಿತ ಕೃಷಿಯನ್ನೇ ನೆಚ್ಚಿಕೊಂಡಿದ್ದಾರೆ. ಇಂತಹ ಮಳೆಯಾಶ್ರಿತ ಕೃಷಿಯನ್ನು ಸುಸ್ಥಿರ ಹಾಗೂ ಲಾಭದಾಯಕ ಕೃಷಿಯನ್ನಾಗಿ ರೂಪಾಂತರಿಸಲು ಕರ್ನಾಟಕ ಸರ್ಕಾರದ ಕೃಷಿ ಇಲಾಖೆಯು ‘ಕೃಷಿ ಭಾಗ್ಯ’ ಯೋಜನೆಯನ್ನು ಜಾರಿಗೆ ತಂದಿದ್ದು, ಇದು ರೈತರಿಗೆ ಅತ್ಯಂತ ಉಪಯುಕ್ತವಾಗಿದೆ. ​ಮಳೆ ನೀರನ್ನು ಸೂಕ್ತವಾಗಿ ಸಂಗ್ರಹಿಸಿ ಬಳಸುವುದರಿಂದ ಮಳೆಯಾಶ್ರಿತ ಭೂಮಿಯಲ್ಲೂ ಕೃಷಿ ಉತ್ಪಾದಕತೆಯನ್ನು ಹೆಚ್ಚಿಸಬಹುದು. ಇದರಿಂದ ರೈತರ ಆದಾಯವೂ ವೃದ್ಧಿಯಾಗುತ್ತದೆ. ಈಗಾಗಲೇ ಮಳೆ ನೀರು ಕೊಯ್ಲು (ಸಂಗ್ರಹಣೆ) ಪದ್ಧತಿಯನ್ನು ಅಳವಡಿಸಿಕೊಂಡು ಕೃಷಿಯಲ್ಲಿ ಉತ್ತಮ ಯಶಸ್ಸು ಕಂಡ ಹಲವು ಸಾಧಕ ರೈತರಿದ್ದಾರೆ.

​ಕೃಷಿ ಭಾಗ್ಯ ಯೋಜನೆಯ ಮುಖ್ಯ ಸೌಲಭ್ಯಗಳು:

​ಕ್ಷೇತ್ರ ಬದು ನಿರ್ಮಾಣ: ಮಣ್ಣು ಮತ್ತು ನೀರು ಸಂರಕ್ಷಣೆಗೆ ಬದುಗಳ ರಚನೆ.
​ಕೃಷಿ ಹೊಂಡ ಹಾಗೂ ಪಾಲಿಥಿನ್ ಹೊದಿಕೆ: ಮಳೆ ನೀರನ್ನು ಸಂಗ್ರಹಿಸಿಡಲು ಹೊಂಡ ಮತ್ತು ನೀರು ಇಂಗಿ ಹೋಗದಂತೆ ತಡೆಯಲು ತಳಭಾಗಕ್ಕೆ ಪಾಲಿಥಿನ್ ಶೀಟ್ ಅಳವಡಿಕೆ.
​ಸುರಕ್ಷತಾ ತಂತಿ ಬೇಲಿ: ಕೃಷಿ ಹೊಂಡದ ಸುತ್ತಲೂ ಭದ್ರತೆಗಾಗಿ ತಂತಿ ಬೇಲಿ.
​ಪಂಪ್‌ಸೆಟ್‌ಗಳ ಅಳವಡಿಕೆ: ಹೊಂಡದಿಂದ ನೀರನ್ನು ಎತ್ತಲು ಡೀಸೆಲ್, ಪೆಟ್ರೋಲ್ ಅಥವಾ ಸೋಲಾರ್ ಪಂಪ್‌ಸೆಟ್‌ಗಳು.
​ಲಘು ನೀರಾವರಿ ಘಟಕ: ಬೆಳೆಗೆ ನೀರು ಹಾಯಿಸಲು ಹನಿ ಅಥವಾ ತುಂತುರು ನೀರಾವರಿ ಪದ್ಧತಿಯ ಅಳವಡಿಕೆ.

​ಕೃಷಿ ಹೊಂಡದ ಅಳತೆ ಹಾಗೂ ಸಹಾಯಧನ:
ಈ ಯೋಜನೆಯಡಿ 10×10×3, 12×12×3, 15×15×3, 18×18×3 ಮತ್ತು 21×21×3 ಮೀಟರ್ ಅಳತೆಯ ಕೃಷಿ ಹೊಂಡಗಳನ್ನು ನಿರ್ಮಿಸಿಕೊಳ್ಳಲು ಅವಕಾಶವಿದೆ. ಕೃಷಿ ಹೊಂಡ ನಿರ್ಮಾಣಕ್ಕೆ ಸಾಮಾನ್ಯ ವರ್ಗದ ರೈತರಿಗೆ ಶೇ. 80 ಹಾಗೂ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡದ ರೈತರಿಗೆ ಶೇ. 90 ರಷ್ಟು ಸಬ್ಸಿಡಿ (ಸಹಾಯಧನ) ಸಿಗಲಿದೆ. ಹೆಚ್ಚಿನ ಮಾಹಿತಿಗೆ ರೈತರು ತಮ್ಮ ಹತ್ತಿರದ ರೈತ ಸಂಪರ್ಕ ಕೇಂದ್ರ ಅಥವಾ ತಾಲ್ಲೂಕು ಕೃಷಿ ಇಲಾಖೆಯನ್ನು ಸಂಪರ್ಕಿಸಬಹುದು.ಎಂದು ಕಾರ್ಕಳದ ತಾಲೂಕು ಸಹಾಯಕ ಕೃಷಿ ನಿರ್ದೇಶಕರು ತಿಳಿಸಿದ್ದಾರೆ.